प्रेम गागर छलकाती जा

 

प्रेम गागर छलकाती जा..

हिवड़ै में हिलोर उठाद्यै

प्रीत री पायलड़ी बजाद्यै

मन रो मोद सोवणो हुज्या

छम छम घूघरा घमकाती जा....

सावण सुरंगे जिसी दिखे

बासंती बायरे सी लागे है

प्रीत रा फुलड़ा खिल ज्यावे

सांसा री सारंगी बजाती जा.....

निजरां पल पल बाट जोवे

थारी खातर अे धीरज खोवे

हेत रा रूंखड़ा सूख जासी

अब प्रेम गागर छलकाती जा...

तनड़े मनड़े बसी थारी बातां

कीकर कटसी अे काळी रातां

कियां चसै हिवड़ै रो दिवळो

बस जीवण जोत जगाती जा...

सुपने में म्हारे नितके आवै

मीठी टिचकार्यां तो दे ज्यावै

फेरूं करलां कीं सयाणी बातां

नेह री थळगट बजाती जा....

    © मनोज व्यास